Umhverfi

Það má segja að íbúar við Bygggarðana muni fá það besta frá báðum hliðum, á aðra kyrrð og fegurð náttúrunnar og svo hina iðandi borgina. Seltjarnarnesið er þekkt útivistarsvæði og hefur sérstakan stað í hjörtum fuglaáhugafólks.

Auðugt fuglalíf er á öllum tíma árs og verpa um 23 tegundir fugla að staðaldri á nesinu. Þykir Seltjarnarnesbúum vænt um fuglalífið og hlúa vel að því en sést hefur til 106 fuglategunda á nesinu.

Göngu- og hjólastígar vefa sig meðfram brimgörðunum þar sem má sjá fólk hjólandi, hlaupandi eða á gangi. Þá er hægt að dýfa fótunum í útilistaverkið Kviku við sjávarsíðuna, njóta öldugjálfursins og dást að Esjunni í allri sinni dýrð.

Nágrenni

Víðsýnt er af Nesinu og töfrum líkast þegar kvöldsólin baðar hafflötinn. Fáir staðir eru eins stjörnubjartir og Snoppa, þar sem vegurinn að Gróttu endar, og er sá staður vinsæll áfangastaður fyrir bæði norðurljósa- og stjörnuskoðun.

Grótta, sem hið nýja hverfi dregur nafn sitt af, er eitt helsta kennileiti Seltjarnarness. Hún er fyrst nefnd í fógetareikningum um 1550. Upphaflega var hún breiður vestasti hluti nessins en landsig og landbrot hafa valdið því að hún varð eyja, landtengd með granda sem stendur upp úr í fjöru. Árið 1897 var reistur þar fyrsti vitinn, en núverandi viti leysti hann af hólmi árið 1947. Fræðasetur er nú rekið í byggingunum í Gróttu.